«Борнмут» клубының бас бапкері Андони Ираола Лиам Росеньор қызметінен кеткеннен кейін «Челсидің» жаңа жаттықтырушысы лауазымына негізгі үміткер ретінде қарастырылып отыр, деп хабарлайды BOOKIE.KZ «Чемпионатқа» сілтеме жасап.
Бұған дейін лондондық клуб ағылшын маманын бас бапкер қызметінен ресми түрде босатқан еді.
Британдық talkSPORT басылымының мәліметінше, Росеньордың ықтимал мұрагерлері қатарына «Ньюкасл» жаттықтырушысы Эдди Хау, «Порту» бас бапкері Франческо Фариоли, сондай-ақ Филипе Луис пен Эдин Терзич те енгізілген. Алайда жазда тұрақты негізде тағайындау үшін басым нұсқа ретінде дәл Ираола қарастырылып жатыр.
Баск маманы қазіргі маусым аяқталған соң «Борнмуттан» кететінін ресми түрде жариялаған. Бұған дейін ол Оливер Гласнердің мұрагері ретінде қарастырылған «Кристал Пэлас» клубының ұсынысынан бас тартқан болатын.
Маусым соңына дейін «Челсидің» бас бапкері міндетін Калум Макфарлейн атқарады. Ол Росеньор қызметінен кеткеннен кейін уақытша жаттықтырушы ретінде тағайындалды. Клуб басшылығы үміткерлерді мұқият іріктеп, жазғы маусым алдындағы дайындық басталғанға дейін жаңа бапкерді бекітуді жоспарлап отыр.